Святитель патриарх Никифор, Константинопольский I

Молитвы

Тропарь

Правило веры и образ кротости,
воздержания учителя
яви тя стаду твоему
Яже вещей Истина:
сего ради стяжал еси смирением высокая,
нищетою богатая,
отче Никифоре,
моли Христа Бога
спастися душам нашим.

Кондак

Победы венец с Небесе,
о Никифоре преславне,
яко прием от Бога,
спасай верою почитающия тя,
яко священноначальника Христова и учителя.

Молитва

О пречестная и священная главо и благодати Святаго Духа исполненная, Спасово со Отцем обиталище, великий архиерее, теплый наш заступниче, святителю Никифор,, предстоя у Престола всех Царя и наслаждаяся света единосущныя Троицы и херувимски со Ангелы возглашая песнь трисвятую, великое же и неисследованное дерзновение имея ко Всемилостивому Владыце, моли спастися паствы Христовы людем, благостояние святых церквей утверди: архиереи благолепием святительства украси, монашествующыя к подвигом доброго течения укрепи, царствующий град и вся грады и страны добре сохрани, и веру святую непорочну соблюсти умоли, мир весь предстательством твоим умири, от глада и пагубы избави ны, и от нападения иноплеменных сохрани, старыя утеши, юныя настави, безумныя умудри, вдовицы помилуй, сироты заступи, младенцы возрасти, пленных возврати, немощствующыя и молящияся тебе от всех напастей и бед ходатайством твоим свободи: моли о нас Всещедраго и Человеколюбиваго Христа Бога нашего, да и в день Страшнаго Пришествия Его от шуяго стояния избавит нас, и радости святых причастники сотворит со всеми святыми во веки веков. Аминь.