Святитель митрополит Фотий Киевский и всея Руси

Молитвы

Тропарь

Словес евангельских послушателю
и Божественных учений рачителю,
премудрый наказателю,
всегда страху Господню поучаяйся,
в молитвах к Богу простираяйся,
заградителю уст кривоглаголющим слово правыя веры,
апостолом сопричастниче,
вере Христовой утвердителю,
пророчески вещателю, святителю Фотие,
моли Христа Бога
умирити мир и спасти души наша.

Кондак

Троице сосуд явися честный твоим житием,
святителю Фотие, всегда зрящий Святую Троицу,
Ейже предстоиши, молися непрестанно о всех нас.

Молитва

О пречестная и священная главо и благодати Святаго Духа исполненная, Спасово со Отцем обиталище, великий архиерее, теплый наш заступниче, святителю Фотий, предстоя у Престола всех Царя и наслаждаяся света единосущныя Троицы и херувимски со Ангелы возглашая песнь трисвятую, великое же и неисследованное дерзновение имея ко Всемилостивому Владыце, моли спастися паствы Христовы людем, благостояние святых церквей утверди: архиереи благолепием святительства украси, монашествующыя к подвигом доброго течения укрепи, царствующий град и вся грады и страны добре сохрани, и веру святую непорочну соблюсти умоли, мир весь предстательством твоим умири, от глада и пагубы избави ны, и от нападения иноплеменных сохрани, старыя утеши, юныя настави, безумныя умудри, вдовицы помилуй, сироты заступи, младенцы возрасти, пленных возврати, немощствующыя и молящияся тебе от всех напастей и бед ходатайством твоим свободи: моли о нас Всещедраго и Человеколюбиваго Христа Бога нашего, да и в день Страшнаго Пришествия Его от шуяго стояния избавит нас, и радости святых причастники сотворит со всеми святыми во веки веков. Аминь.