Святитель архиепископ Савва II Сербский

Молитвы

Тропарь

Исправление веры и образ кротости, и якоже сад посреде рая, преподобными делы твоими мир просвещаеши, сего ради к честней раце мощей твоих любовию прикасаемся, лобызаем их и верно вопием: предстани в помощь воспевающим память святую твою и светоносную, святителю отче Савво пребогате, молимся, Христу Богу молися, спастися духам нашим.

Кондак

Яко архиереем сопрестольник, и святителем изрядный поборник был еси, святителю Савво, сохраняй отечество, обитель, град же и люди. Почитающие тя верою, и честным твоим мощем покланяющиеся, да велегласно тебе вопием: радуйся, Савво богомудре.

Молитва

О пречестная и священная главо и благодати Святаго Духа исполненная, Спасово со Отцем обиталище, великий архиерее, теплый наш заступниче, святителю Савва, предстоя у Престола всех Царя и наслаждаяся света единосущныя Троицы и херувимски со Ангелы возглашая песнь трисвятую, великое же и неисследованное дерзновение имея ко Всемилостивому Владыце, моли спастися паствы Христовы людем, благостояние святых церквей утверди: архиереи благолепием святительства украси, монашествующыя к подвигом доброго течения укрепи, царствующий град и вся грады и страны добре сохрани, и веру святую непорочну соблюсти умоли, мир весь предстательством твоим умири, от глада и пагубы избави ны, и от нападения иноплеменных сохрани, старыя утеши, юныя настави, безумныя умудри, вдовицы помилуй, сироты заступи, младенцы возрасти, пленных возврати, немощствующыя и молящияся тебе от всех напастей и бед ходатайством твоим свободи: моли о нас Всещедраго и Человеколюбиваго Христа Бога нашего, да и в день Страшнаго Пришествия Его от шуяго стояния избавит нас, и радости святых причастники сотворит со всеми святыми во веки веков. Аминь.