Святитель архиепископ Никодим Сербский

Молитвы

Тропарь

Правило веры и образ кротости,
воздержания учителя
яви тя стаду твоему,
Яже вещей Истина,
сего ради стяжал еси смирением высокая,
нищетою богатая,
отче священноначальниче Никодиме,
моли Христа Бога,
спастися душам нашим.

Кондак

Божественный гром, труба духовная,
веры насадителю, и отсекателю ересей,
Троицы угодниче, великий святителю,
со Ангелы предстоя присно,
моли непрестанно о всех нас.

Молитва

О пречестная и священная главо и благодати Святаго Духа исполненная, Спасово со Отцем обиталище, великий архиерее, теплый наш заступниче, святителю Никодим, предстоя у Престола всех Царя и наслаждаяся света единосущныя Троицы и херувимски со Ангелы возглашая песнь трисвятую, великое же и неисследованное дерзновение имея ко Всемилостивому Владыце, моли спастися паствы Христовы людем, благостояние святых церквей утверди: архиереи благолепием святительства украси, монашествующыя к подвигом доброго течения укрепи, царствующий град и вся грады и страны добре сохрани, и веру святую непорочну соблюсти умоли, мир весь предстательством твоим умири, от глада и пагубы избави ны, и от нападения иноплеменных сохрани, старыя утеши, юныя настави, безумныя умудри, вдовицы помилуй, сироты заступи, младенцы возрасти, пленных возврати, немощствующыя и молящияся тебе от всех напастей и бед ходатайством твоим свободи: моли о нас Всещедраго и Человеколюбиваго Христа Бога нашего, да и в день Страшнаго Пришествия Его от шуяго стояния избавит нас, и радости святых причастники сотворит со всеми святыми во веки веков. Аминь.