Святитель архиепископ Григорий Палама, Солунский (Фессалоникийский)

Молитвы

Тропарь

Православия светильниче,
Церкве утверждение и учителю, монахов доброто,
богословов поборниче непреоборимый, Григорие чудотворче,
Фессалонитская похвало, проповедниче благодати,
молися выну спастися душам нашим.

Кондак

Премудрости священный и Божественный орган,
богословия светлую согласно трубу, воспеваем тя, Григорие богоглагольниче,
но яко ум, Уму первому предстояй,
к Нему ум наш, отче, настави, да зовем:
радуйся, проповедниче благодати.

Молитва

О пречестная и священная главо и благодати Святаго Духа исполненная, Спасово со Отцем обиталище, великий архиерее, теплый наш заступниче, святителю Григорий, предстоя у Престола всех Царя и наслаждаяся света единосущныя Троицы и херувимски со Ангелы возглашая песнь трисвятую, великое же и неисследованное дерзновение имея ко Всемилостивому Владыце, моли спастися паствы Христовы людем, благостояние святых церквей утверди: архиереи благолепием святительства украси, монашествующыя к подвигом доброго течения укрепи, царствующий град и вся грады и страны добре сохрани, и веру святую непорочну соблюсти умоли, мир весь предстательством твоим умири, от глада и пагубы избави ны, и от нападения иноплеменных сохрани, старыя утеши, юныя настави, безумныя умудри, вдовицы помилуй, сироты заступи, младенцы возрасти, пленных возврати, немощствующыя и молящияся тебе от всех напастей и бед ходатайством твоим свободи: моли о нас Всещедраго и Человеколюбиваго Христа Бога нашего, да и в день Страшнаго Пришествия Его от шуяго стояния избавит нас, и радости святых причастники сотворит со всеми святыми во веки веков. Аминь.