Священномученик пресвитер Михаил Березин

Молитвы

Тропарь

Якоже плод красный спасительнаго сеяния Христова,
благоугодная жертва Царю и Богу показался еси,
священномучениче отче Михаиле:
мужеством бо древним страстотерпцем поревновав,
венец равночестен от Подвигоположника приял еси.
Того моли спасти души наша.

Кондак

Светило разумное приидите восхвалим, вернии,
в земли Марийской просиявшее,
священномученика Михаила:
ризу бо священства во дни гонений прияв,
кровьми своими яко багряницу царскую содела,
и ныне со апостолы Святей Троице предстоит,
моляся о всех нас.

Молитва

О избранниче и угодниче Христов Михаил, священномучениче, Церкве Русския столпе непоколебимый, земли нашея благое прозябение и красный плод, сродников твоих предстателю и наставниче! Ты во время гонения безбожнаго от сокровищницы души твоея спасительное исповедание Православныя веры изнесл еси, и людем верным пастырь добрый явился еси, душу твою за Христа и Его овцы полагая и лютыя волки далече отгоняя. Ныне убо призри на нас, недостойных чад твоих, умиленною душею и сокрушенным сердцем тя призывающих. Умоли Господа Бога, да простит согрешения наша и избавит от адовых уз и вечнаго мучения. Утверди нас в вере святой, научи нас всегда творити волю Божию и хранити заповеди церковныя. Буди пастырем нашим - правило веры, воином - вождь духовный, болящим - врач изрядный, печальным - утешитель, гонимым - заступник, юным - наставник, всем же благосердый отец и теплый молитвенник, яко да молитвами твоими соблюдется в Православии Святая Русь и непрестанно славится в ней имя Пресвятыя Троицы, Отца и Сына и Святаго Духа во веки веков. Аминь.