Священномученик пресвитер Адриан Троицкий

Молитвы

Тропарь

Якоже плод красный спасительнаго сеяния Христова, новыя мученицы благоугодныя жертвы показашася Царю и Богу, священне Адриане, учителю веры и проповедниче Благодати, и Михаиле, образе смирения и незлобия: сего ради древних страстотерпцев венцы равночестныя приясте от Подвигоположника. Того, яко Блага, молите спастися, молимся, душам нашим.

Кондак

Светила разумная приидите восхвалим, вернии, священномучеников Адриана и Михаила воспоем во гласе хваления, мученическою бо кровию омывше землю Марийскую во время отступничества и помрачения, яко багряницею тою преукрасишася, и ныне Святей Троице предстоят, моля о нас Единаго Человеколюбца.

Молитва

О избранниче и угодниче Христов Адриан, священномучениче, Церкве Русския столпе непоколебимый, земли нашея благое прозябение и красный плод, сродников твоих предстателю и наставниче! Ты во время гонения безбожнаго от сокровищницы души твоея спасительное исповедание Православныя веры изнесл еси, и людем верным пастырь добрый явился еси, душу твою за Христа и Его овцы полагая и лютыя волки далече отгоняя. Ныне убо призри на нас, недостойных чад твоих, умиленною душею и сокрушенным сердцем тя призывающих. Умоли Господа Бога, да простит согрешения наша и избавит от адовых уз и вечнаго мучения. Утверди нас в вере святой, научи нас всегда творити волю Божию и хранити заповеди церковныя. Буди пастырем нашим - правило веры, воином - вождь духовный, болящим - врач изрядный, печальным - утешитель, гонимым - заступник, юным - наставник, всем же благосердый отец и теплый молитвенник, яко да молитвами твоими соблюдется в Православии Святая Русь и непрестанно славится в ней имя Пресвятыя Троицы, Отца и Сына и Святаго Духа во веки веков. Аминь.