Священномученик епископ Василий (Зеленцов), Прилукский

Молитвы

Тропарь

Святое житие твое
украсив венцем мучения,
возшел еси, радуяся,Ї к небесным обителем.
И ныне, предстоя Святей Троице,
священномучениче Василие,
моли за град Твой,
и вся люди, совершающия память Твою.

Кондак

Елеем милости Христовой всяку душу уврачевав,
и растерзав яко паучину козни велиаровы,
копием Слова Божия диавола умертвил еси, святе,
и прославился еси в Царствии Небеснем,
отче священнейший.

Молитва

О избранниче и угодниче Христов Василий, священномучениче, Церкве Русския столпе непоколебимый, земли нашея благое прозябение и красный плод, сродников твоих предстателю и наставниче! Ты во время гонения безбожнаго от сокровищницы души твоея спасительное исповедание Православныя веры изнесл еси, и людем верным пастырь добрый явился еси, душу твою за Христа и Его овцы полагая и лютыя волки далече отгоняя. Ныне убо призри на нас, недостойных чад твоих, умиленною душею и сокрушенным сердцем тя призывающих. Умоли Господа Бога, да простит согрешения наша и избавит от адовых уз и вечнаго мучения. Утверди нас в вере святой, научи нас всегда творити волю Божию и хранити заповеди церковныя. Буди пастырем нашим - правило веры, воином - вождь духовный, болящим - врач изрядный, печальным - утешитель, гонимым - заступник, юным - наставник, всем же благосердый отец и теплый молитвенник, яко да молитвами твоими соблюдется в Православии Святая Русь и непрестанно славится в ней имя Пресвятыя Троицы, Отца и Сына и Святаго Духа во веки веков. Аминь.