Священноисповедник пресвитер Николай Писаревский

Молитвы

Тропарь

Священноисповедниче отче Николай,
во дни гонений безбожных на Церковь Русскую
поношения, заточение, изгнание и горькия работы
Христа ради претерпел еси,
и ничтоже разлучи тя от любве Божия.
Таже благочестно в мире пожив,
свидетельствовал еси Господа Иисуса Христа,
Егоже моли спастися душам нашим.

Кондак

Яко звезда новая Церкве Русския явился еси,
терпеливодушне Николай священноисповедниче,
Христа Бога прасловляя
и в нощи безбожия путь верным указуя;
темже молим тя:
моли нам, сродником твоим,
в вере Православней утвердитися
и спастися душам нашим.

Молитва

«О, преславный и добропобедный священноисповедниче Христов Николай, пастырю добрый, Церкве Русския украшение, земли нашея доброе прозябение, сродников твоих похвало и образе! Ты не убоялся мучителева прещения, веру Православную небоязненно исповедал еси, и болезни и страдания с любовию ко Христу претерпев, вратами правды в Небесное Царство вшел еси. Темже молим тя: вознеси ныне теплую молитву твою ко Господу о Отечестве нашем, да утвердит его в вере Православней до скончания века, да избавит ны от междоусобныя брани и всяких бед и напастей, да возродит в людех наших дух благочестия и страха Божия, да паки будем мы царское священие, род Божий, избранный и святый, присно с вами славящий Отца и Сына и Святаго Духа во веки веков. Аминь