Ветрилом креста душевный корабль окормив, житейская красная оставил еси, и от мирскаго мятежа изшед, плотския похоти воздержанием многим отче умертвил еси, пощением и слезами, молитвами и песньми непрестанно прилепляяся к Богу; темже и жилище достойно Духа Пресвятаго показался еси. Моли, Поликарпе преподобне, Христа Бога, оставление прегрешений даровати нам и велию милость.
Якоже отец духовно, князь чувственно, людем российским явился еси, преподобне Поликарпе; мудрование бо и славу мирскую презрев, Божественным житием последовал еси, монахом же был твердое укрепление и светильник светел; темже похваляюще честную память твою, зовем ти: моли Христа Бога спасти и просветити души наша.
О пастырю добрый, наставниче неусыпный, преподобне отче Поликарпе, ты от мятежа мира сего исшед, отвержением благ преходящих Евангельски Христу последовал еси, и равноангельское житие пожив, Бесплотных почести сподобился еси; того ради памятуя любовь твою к людям ти сродным, яко чадо ко отцу, к тебе прибегаем и молимся со умилением: буди щит несокрушим Святей Церкви Православней и отечеству нашему, воинству, яко соратник, и споспешествуй в победах на супостаты. Избави, о преподобне угодниче Божий, от всякого навета вражия и веси страны Российския и не остави заступлением твоим нас немощных, грехи и скорбми многими обремененных: умоли благость Христа Бога нашего даровати нам помыслов мир, от пагубных страстей и всякия скверны воздержание, братолюбие искреннее,благочестие нелицемерно и да не во зло обратим благая, нам свыше выну посылаемая. Озари, преблаженне, ум наш светом лица Божия, иже ныне осиявает тя; укрепи благодатиею Господнею произволение наше, да утвердившееся в законе Христове, неленостно течем по пути заповедей святых; осени горним твоим благословением нас и всех в скорбех сущих, беды и болезньми душевными и телесными обдержимых, исцеление, утешение и избавление им даруя; дух кротости и смирения, дух терпения и покаяния, да прочее время живота нашего иждевем в вере и сокрушении сердечнем и тако в час скончания и разрешения от уз плоти благодарне восхвалим прославившего тя Господа, Безночального Отца, Единородного Его Сына и Единосущного и Всеблагого Духа, Троицу Нераздельную во веки веков.