Яко кедр, в пустыни давидски растущ, и яко финикс, благоуханен цветущ,
ревнитель учителю твоему был еси, преподобному отцу Корнилию,
стопам бо его последовал еси
и, святое иго взем,
светлым житием просиял еси, яко солнце,
явлься мирови многими чудесы, отче Филиппе!
И ныне на Небесех предстоиши Престолу Пресвятыя Троицы
и, яко великое имея дерзновение,
преподобнии свой руце воздев,
моли от враг сохранитися градом нашим
и спастися душам нашим.
Преподобне и богоблаженне отче наш Филиппе, приими ныне нас, молящихся и припадающих тебе зде, идеже святое и многотрудное покоится тело твое, духом же на Небеси предстоиши Святей Троице, молися о нас, чадех твоих, отче, да избавимся всяких скорбей и болезней душевных и телесных и благочестне поживем в настоящем житии, и в будущем веке сподоби нас со всеми святыми покланятися в Троице славимому Богу, Отцу, и Сыну, и Святому Духу ныне и присно и во веки веков. Аминь.