Преподобномученица послушница Надежда Круглова

Молитвы

Тропарь

Христа Господа Иисуса верная ученице,
Церкве Российския избранная агнице,
преподобная страстотерпице Надежда,
легкое иго и язвы Господни любовию носящи,
лествицею мучений
к Нему, яко Небесному Жениху, востекла еси,
Егоже моли сохранити в благочестии люди Российския
и спасти души наша.

Кондак

Яко крин багряновидный,
посреде терний безбожия
в земнем отечестве твоем процвела еси,
преподобномученице Надежда честая,
подвиги воздержания страданием украсивши,
востекла еси к Небесному Жениху Христу,
Иже увенча тя красотою славы нетленныя.

Молитва

О всехвальная преподобномученице Надежда, кроткая Христова агнице, земли Российския цвете благоуханный, избранная, непорочная и добрая в женах! Ты любовию последовала еси Христу, благое иго заповедей Его терпеливо подъёмши и язвы Его преподобием носящи: во дни же гонений на Церковь Русскую мужественне во исповедании православныя веры пребыла еси, и житие монашеское подвигом мучения увенчавши, в чертог Небеснаго Жениха возшла еси. Темже молим тя, славная в женах мученице: моли церкви нашей в мире и благоденствии пребывати, державе же Российстей непоколебимей в православии и мире сохранитися и всех врагов сокрушити: женам, подвиг иночества восприимшым, во благочестии и послушаниих монашеских укрепитися, в ревности по Богу не оскудевати и неропотным, бодренным и благодарным всегда быти: нам же любовию тя почитающым, испроси время на покаяние, твердость во исповедании веры истинныя, заступление от козней вражиих и на страшнем суде предстояние одесную Господа нашего Иисуса Христа, Емуже со Отцем и Святым Духом подобает всякая слава, честь и поклонение, ныне и присно, и во веки веков. Аминь