Преподобномученик игумен Мефодий Пешношский

Молитвы

Тропарь

Божественною любовию от юности распаляемь,
вся, яже в мире красная, возненавидев,
Христа Единаго возлюбил еси,
и, сего ради в пустыню вселився,
в ней обитель сотворил еси,
и, собрав инок множество,
приял еси от Бога чудес дар, отче Мефодие,
и был еси о Христе собеседник и спостник преподобному Сергию,
с нимже у Христа Бога испроси православным христианом здравие, и спасение,
и душам нашим велию милость.

Кондак

Послушания добрый рачитель быв,
безплотныя враги слезными молитвами твоими крепко посрамил еси
и явился еси Пресвятыя Троицы жилище,
Юже зря, блаженне, ясно,
Богомудре Мефодие преподобне,
чудес дар от Ней приял еси.
Темже исцелявши с верою приходящих недуги,
утолявши скорби
и молишися непрестанно о всех нас.

Молитва

О пречестный и доблестный преподобномучениче Христов Мефодий! Ты, воин непобедимый Христов, подвигом добрым подвизався на земли, венец правды от Господа приял еси. Темже взирающе на образ твой святый, радуемся о преславнем скончании жительства твоего и чтим святую память твою. Ты же, предстоя Престолу Божию, приими моления наша и ко Всемилостивому Богу принеси, о еже простити нам всякое прегрешение и помощи нам стати противу кознем диавольским, да избавльшеся от скорбей, болезней, бед и напастей и всякаго зла, благочестно и праведно поживем в нынешнем веке и сподобимся предстательством твоим, аще и недостойни есмы, видети благая на земли живых, славяще Единаго во святых Своих славимаго Бога, Отца и Сына и Святаго Духа, ныне и во веки веков. Аминь.