Преподобномученик игумен Серафим (Крестьянинов)
День памяти
святого: 10 декабря
Молитвы
Тропарь
Божиим смотрением к мученическому венцу призванный,
исповедник небоязненный веры Христовы явился еси,
преподобномучениче Серафиме,
страдание же и смерть от безбожных претерпев,
ныне в сонме новомучеников Церкве Русския радуешися.
Моли Милостиваго Бога о спасении душ наших.
Кондак
На камени благочестия утвердився,
мирскую суету отвергл еси
и, пламенною любовию к Богу возгоревся,
во обитель преподобнаго Сергия пришел еси,
во дни же гонений душу за Христа положив,
венцем страдания увенчался еси.
Темже, преподобномучениче Серафиме,
молися в Православии нам утвердитися
и спастися душам нашим.
Молитва
О пречестный и доблестный преподобномучениче Христов Серафим! Ты, воин непобедимый Христов, подвигом добрым подвизався на земли, венец правды от Господа приял еси. Темже взирающе на образ твой святый, радуемся о преславнем скончании жительства твоего и чтим святую память твою. Ты же, предстоя Престолу Божию, приими моления наша и ко Всемилостивому Богу принеси, о еже простити нам всякое прегрешение и помощи нам стати противу кознем диавольским, да избавльшеся от скорбей, болезней, бед и напастей и всякаго зла, благочестно и праведно поживем в нынешнем веке и сподобимся предстательством твоим, аще и недостойни есмы, видети благая на земли живых, славяще Единаго во святых Своих славимаго Бога, Отца и Сына и Святаго Духа, ныне и во веки веков. Аминь.