Преподобномученик игумен Григорий Авнежский

Молитвы

Тропарь

Православия наставницы,
благочестия и чистоты учителие,
Церкви Вологодстей богодарованное украшение,
преподобнии отцы наши Григорие и Кассиане,
молите Милостиваго Бога,
да вашим предстательством подаст благодать и мир стране нашей
и душам нашим спасение.

Кондак

Иже плотская мудрования Духови повинувше
и вся, яже на земли, презревше,
Христу, Единому Богу, прилепившеся, святии,
и Того ради в пустыню вселишася,
источаете ныне исцеления
с верою притекающим к мощем вашим,
полезная нам просите от Бога
молитвами вашими богоприятными,
Григорие и Кассиане преподобнии.

Молитва

О пречестный и доблестный преподобномучениче Христов Григорий! Ты, воин непобедимый Христов, подвигом добрым подвизався на земли, венец правды от Господа приял еси. Темже взирающе на образ твой святый, радуемся о преславнем скончании жительства твоего и чтим святую память твою. Ты же, предстоя Престолу Божию, приими моления наша и ко Всемилостивому Богу принеси, о еже простити нам всякое прегрешение и помощи нам стати противу кознем диавольским, да избавльшеся от скорбей, болезней, бед и напастей и всякаго зла, благочестно и праведно поживем в нынешнем веке и сподобимся предстательством твоим, аще и недостойни есмы, видети благая на земли живых, славяще Единаго во святых Своих славимаго Бога, Отца и Сына и Святаго Духа, ныне и во веки веков. Аминь.