Преподобномученик иеромонах Ксенофонт (Бондаренко)

Молитвы

Тропарь

Трудолюбне послушания во обители Святыя Троицы исполняя,
добродетельному житию навыкл еси,
во дни же гонений священство мужественне восприим,
Богу и людем усердне послужил еси
и, волны злобных прещений о камень веры сокрушив,
кровь свою за Христа пролиял еси,
преподобномучениче Ксенофонте,
добропобедне воине Христов.
Сего ради любовию вопием:
слава Давшему ти крепость,
слава Венчавшему тя,
слава Прославльшему тя с новомученики Церкве нашея.

Кондак

Божественным желанием распалився,
исповеданием Православныя веры гонители посрамил еси,
огнь же мучений лютых претерпев,
древним страдальцем уподобился еси,
Ксенофонте терпеливодушне.
Ныне с преподобномучеником Кронидом Престолу Божию предстоя,
прославляеши Христа Жизнодавца
и молишися о душах наших.  

Молитва

О пречестный и доблестный преподобномучениче Христов Ксенофонт! Ты, воин непобедимый Христов, подвигом добрым подвизався на земли, венец правды от Господа приял еси. Темже взирающе на образ твой святый, радуемся о преславнем скончании жительства твоего и чтим святую память твою. Ты же, предстоя Престолу Божию, приими моления наша и ко Всемилостивому Богу принеси, о еже простити нам всякое прегрешение и помощи нам стати противу кознем диавольским, да избавльшеся от скорбей, болезней, бед и напастей и всякаго зла, благочестно и праведно поживем в нынешнем веке и сподобимся предстательством твоим, аще и недостойни есмы, видети благая на земли живых, славяще Единаго во святых Своих славимаго Бога, Отца и Сына и Святаго Духа, ныне и во веки веков. Аминь.