Преподобномученик Евстратий Печерский
Дни памяти
святого: 8 марта, 10 апреля, 11 октября
Молитвы
Тропарь
Постником и мучеником явился еси похвала, преподобне Евстратие,
прежде бо воздержанием плоть умертвив,
последовал еси Христу, нося крест свой.
Последи же и сам на крест вознесен быв
и копнем в ребра прободен,
в руце Божий душу предал еси.
Колесницею огненною возносим на Небеса,
сугубо венчался еси от Христа Бога
и Спаса душ наших.
Кондак
Яко ревнитель страсти Владычней
и постников усердный последователь сый,
пленники учением твоим наставль, Христови привел еси, Евстратие,
и нас, плененных страстьми, мольбами своими свободи
и подражатели честному твоему житию покажи, зовущих:
радуйся, испивый сладостне чашу Христовых страданий.
Молитва
О пречестный и доблестный преподобномучениче Христов Евстратий! Ты, воин непобедимый Христов, подвигом добрым подвизався на земли, венец правды от Господа приял еси. Темже взирающе на образ твой святый, радуемся о преславнем скончании жительства твоего и чтим святую память твою. Ты же, предстоя Престолу Божию, приими моления наша и ко Всемилостивому Богу принеси, о еже простити нам всякое прегрешение и помощи нам стати противу кознем диавольским, да избавльшеся от скорбей, болезней, бед и напастей и всякаго зла, благочестно и праведно поживем в нынешнем веке и сподобимся предстательством твоим, аще и недостойни есмы, видети благая на земли живых, славяще Единаго во святых Своих славимаго Бога, Отца и Сына и Святаго Духа, ныне и во веки веков. Аминь.