Праведная Тавифа Иоппийская

Молитвы

Тропарь

Днесь вера Христова утверждается камнем веры,
и ликовствует в веселии Иоппия,
псаломски славословят Жизнодавца Сына Божия вернии,
видяще совершаемо велие чудо:
первоверховный апостол глаголет,
и умершая востает от гроба,
юже Низложитель смерти дарует Церкви,
да украшаются во образ ея добродетельми люди.
Приидите убо, христиане,
принесем ко святей моления наша:
блаженная Тавифо и милосердная,
вознеси наша воздыхания Пресвятей Троице
и молися со дерзновением,
да сынове Света Превечнаго будем,
да сподобимся Божия милости,
да пребываем в любви Божественней,
и да царствует мир во вселенней.

Кондак

Ужасахуся Иоппийстии людие, и дивляхуся ангели Божии, егда Исцеливый Еннея воззва от мертвых серну нарицаемую, милосердием преукрашенную, о нейже к Нему взываху вдовицы неимущия. И ныне, Тавифо блаженная, услыши молитвы наша, к тебе приносимыя, и испроси у всяческих благ Подателя милости и щедроты верным Его, да блажаще тя, вопием ти: радуйся, добродетели нас научающая.

Молитва

Праведнице святая Тавифа! Жизнию своею благочестною и добродетельною образ явила еси верным, яко в мире сем возможно есть жити по заповедем Христовым и стяжати Духа Святаго. Темже взирающе на труды твоя и подвиги, смиренно молим тя: предстоя Престолу Вседержителя, моли о нас грешных, да подаст нам Господь покаяние истинное, дух смирения и кротости, терпение в скорбех, благодарение в благополучии, и во всем житии нашем укрепит нас, да не отступим от пути спасения, но, подражая житию твоему, сподобимся молитвами твоими наследия Царствия Небеснаго, со всеми святыми славящаго Отца и Сына и Святаго Духа, ныне и присно и во веки веков. Аминь.