Мученица Татиана Гримблит

Молитвы

Тропарь

Мироносицам женам в добродетелех подражающи,
в темницах и узах сущим усердно послужила еси
и, образ евангельскаго милосердия нам показавши,
за Христа мученическую смерть прияла еси,
Татиано преславная.
Ныне, престолу Божию предстоящи,
моли спастися душам нашим.

Кондак

Слово Божие сердцем твоим восприемши,
миру распялася еси,
святая мученице Татиано,
и, в служении страждущим Богу угодивши,
плод добродетелей обилен пожала еси.
Сего ради буди нам ходатаица
и умоли Создателя всех,
бесплодие сердец наших исцелити,
да принесем Ему плоды покаяния,
любовь, милосердие и смирение.

Молитва

О, святая мученице Христова, Татиано! Агнца Божия непорочная агнице, целомудрия голубице, невесто Христа, Жениха твоего!
Ты, во дни жития твоего мирския похоти презревши, паче земных благ Господа возлюбила еси и во страданиих обрела еси небесный покой. Призри ныне с Небесе и виждь, яко погибаем во обстояниих и скорбех наших. К тебе прибегаем и твоея милости просим, не отвержи нас, убогих чад твоих, не имущих елея добрых дел, и на путь покаяния настави. Помяни старцы и юныя, сироты и вдовицы, нищия и убогия, в темницах и заточении сущия, недугующия и скорбящия, изряднее же, гонимыя веры ради Православныя. Нас же, юзами греха связанныя, разреши и ко спасению скоро направи, тебе бо дадеся благодать молитися за ны. Да, твоим предстательством ограждаеми, достигнем Царствия Небеснаго, идеже вси святии пребывают, прославляюще Имя Пресвятыя Троицы, Отца и Сына и Святаго Духа во веки веков. Аминь.