Мученик Стефан Казанский

Молитвы

Тропарь

Мучеников двоица единонравная,
Стефане и Петре славнии,
неверие соплеменников обличивше,
Христу последовали есте,
во Святую Троицу веровати всех научающе,
Еяже ради великия страдания приемше,
молитеся о нас ко Господу,
да, избавившеся тьмы греховныя,
Света явимся общницы невечерняго.

Кондак

Святии страстотерпцы Стефане и Петре,
Троицы поборницы преизряднейшии,
мук треволнения и страшную смерть на вечную жизнь пременившии
во граде Казани страдальчествовавшии,
ныне же в Небесных чертозех Всецарю предстоящии,
от всяких нас грехопадений избавити Христа Бога молите,
Той бо есть верных утверждение.

Молитва

О святый угодниче Божий, мучениче Стефан! Подвигом добрым подвизався на земли, восприял еси на Небесех венец правды, его же уготовал есть Господь всем любящим Его. Темже взирающе на святый твой образ, радуемся о преславнем скончании жительства твоего и чтим святую память твою. Ты же, предстоя Престолу Божию, приими моления наша и ко Всемилостивому Богу принеси, о еже простити нам всякое прегрешение и помощи нам стати противу кознем диавольским, да избавльшеся от скорбей, болезней, бед и напастей и всякаго зла, благочестно и праведно поживем в нынешнем веке и сподобимся предстательством твоим, аще и недостойни есмы, видети благая на земли живых, славяще Единаго во святых Своих славимаго Бога, Отца и Сына и Святаго Духа, ныне и во веки веков. Аминь.