Мученик Савин Ермопольский (Египетский)

Молитвы

Тропарь

Божественная прозябения,
цвет неувядающий,
розга многоплодная, богоносе Савине,
иже верою чтущих память твою
веселия твоего исполни
и молися непрестанно о всех нас.

Кондак

Звезда светлая явился еси,
непрелестная мирови,
солнца Христа возвещающи,
зарями твоими мучениче Савин,
и прелесть погасил еси всю:
нам же подаеши свет,
молияся непрестанно о всех нас.

Молитва

О святый угодниче Божий, мучениче Савин! Подвигом добрым подвизався на земли, восприял еси на Небесех венец правды, его же уготовал есть Господь всем любящим Его. Темже взирающе на святый твой образ, радуемся о преславнем скончании жительства твоего и чтим святую память твою. Ты же, предстоя Престолу Божию, приими моления наша и ко Всемилостивому Богу принеси, о еже простити нам всякое прегрешение и помощи нам стати противу кознем диавольским, да избавльшеся от скорбей, болезней, бед и напастей и всякаго зла, благочестно и праведно поживем в нынешнем веке и сподобимся предстательством твоим, аще и недостойни есмы, видети благая на земли живых, славяще Единаго во святых Своих славимаго Бога, Отца и Сына и Святаго Духа, ныне и во веки веков. Аминь.