Мученик Никифор Антиохийский (Сирский)
День памяти
святого: 22 февраля
Молитвы
Тропарь
Мученик Твой, Господи, Никифор,
во страдании своем венец прият нетленный от Тебе, Бога нашего,
имеяй бо крепость Твою,
мучителей низложи,
сокруши и демонов немощныя дерзости.
Того молитвами
спаси души наша.
Кондак
Любве союзом связався, Никифоре,
разрушил еси яве злобу ненависти
и мечем во главу твою усечен был еси,
мученик Божественный воплощшагося Спаса,
Егоже о нас моли, поющих славную память твою.
Молитва
О святый угодниче Божий, мучениче Никифор! Подвигом добрым подвизався на земли, восприял еси на Небесех венец правды, его же уготовал есть Господь всем любящим Его. Темже взирающе на святый твой образ, радуемся о преславнем скончании жительства твоего и чтим святую память твою. Ты же, предстоя Престолу Божию, приими моления наша и ко Всемилостивому Богу принеси, о еже простити нам всякое прегрешение и помощи нам стати противу кознем диавольским, да избавльшеся от скорбей, болезней, бед и напастей и всякаго зла, благочестно и праведно поживем в нынешнем веке и сподобимся предстательством твоим, аще и недостойни есмы, видети благая на земли живых, славяще Единаго во святых Своих славимаго Бога, Отца и Сына и Святаго Духа, ныне и во веки веков. Аминь.