Мученик князь Михаил Всеволодович Черный, Черниговский

Молитвы

Тропарь Михаилу, князю

Троичнаго Божества осиянием просветився,
страстотерпче великий княже Михаиле,
с премудрым болярином ти Феодором,
самозванна к подвигом устремистася,
сквозе огнь не идоста,
кусту же и идолом не поклонистася, но оплеваста
и нечестиваго царя обличиста,
Христа же Единаго от Троицы Бога Суща исповедаста.
И того ради кровей своих струями обагристася, славная.
Темже и венца от Него победная прилета,
и нас свыше назираета,
молим ва, святая, молите Того,
яко да вашими молитвами избавит нас от всяких обстоящих ны зол
и подаст нам вся благая,
Иже Един Сый прославляемый во святых Своих.

Кондак Михаилу, князю

Царство земное в ничтоже вменив,
славу, яко преходящую, оставил еси,
самозван пришед к подвигом,
Троицу проповедал еси пред нечестивым мучителем,
страстотерпче Михаиле с доблим Феодором,
Царю сил предстояще,
молите без вреда сохранити Отечество ваше, град же и люди,
да вас непрестанно почитаем.

Молитва Михаилу, князю

О святый угодниче Божий, мучениче Михаил! Подвигом добрым подвизався на земли, восприял еси на Небесех венец правды, его же уготовал есть Господь всем любящим Его. Темже взирающе на святый твой образ, радуемся о преславнем скончании жительства твоего и чтим святую память твою. Ты же, предстоя Престолу Божию, приими моления наша и ко Всемилостивому Богу принеси, о еже простити нам всякое прегрешение и помощи нам стати противу кознем диавольским, да избавльшеся от скорбей, болезней, бед и напастей и всякаго зла, благочестно и праведно поживем в нынешнем веке и сподобимся предстательством твоим, аще и недостойни есмы, видети благая на земли живых, славяще Единаго во святых Своих славимаго Бога, Отца и Сына и Святаго Духа, ныне и во веки веков. Аминь.