Мученик князь Иоанн-Владимир Сербский

Молитвы

Тропарь

Крест, явльшийся тебе с Небесе, светел проповедал еси,
просветив языки ясно, Владимире славне,
обагреньми кровей твоих украсився,
сподобился еси почестей нетленных,
предстояй Троице,
тем со дерзновением
моли спастися нам.

Кондак

Яко сокровище многоценное
и источник, точащ земным токи,
недуги очищающий,
нам подадеся тело твое священное,
болезнем различным подающе исцеление
и благодать Божественную притекающим к нему, да зовем ти:
радуйся, княже Владимире.

Молитва

О святый угодниче Божий, мучениче Иоанн! Подвигом добрым подвизався на земли, восприял еси на Небесех венец правды, его же уготовал есть Господь всем любящим Его. Темже взирающе на святый твой образ, радуемся о преславнем скончании жительства твоего и чтим святую память твою. Ты же, предстоя Престолу Божию, приими моления наша и ко Всемилостивому Богу принеси, о еже простити нам всякое прегрешение и помощи нам стати противу кознем диавольским, да избавльшеся от скорбей, болезней, бед и напастей и всякаго зла, благочестно и праведно поживем в нынешнем веке и сподобимся предстательством твоим, аще и недостойни есмы, видети благая на земли живых, славяще Единаго во святых Своих славимаго Бога, Отца и Сына и Святаго Духа, ныне и во веки веков. Аминь.