Мученик Георгий Новый, Серб, Софийский, Болгарский
День памяти
святого: 8 июня
Молитвы
Тропарь
В терпении многоискуснем, блаженне мучениче Георгие,
огнеискусную смерть претерпел еси
и по кончине твоей венец от Христа нетленный
с мученическими лики приял еси.
И ньше, на земли кротких достойно водворялся,
Христа Бога о нас непрестанно моли,
иже верою покланяющихся раце мощей твоих.
Кондак
Яко звезда пресветлая, явился еси непрелестная мирови,
праведнаго солнца Христа возвещающи страдании твоими, страстотерпче,
великий мучениче Христов Георгие,
и прелесть погасил еси срацынскую,
и Моамефова предания и законы под ногами твоими попрал еси,
и беззаконнаго царя и мучителей ужасил еси крепким твоим терпением,
и верным подаеши свет,
моляся к Богу непрестанно
о всех нас.
Молитва
О святый угодниче Божий, мучениче Георгий! Подвигом добрым подвизався на земли, восприял еси на Небесех венец правды, его же уготовал есть Господь всем любящим Его. Темже взирающе на святый твой образ, радуемся о преславнем скончании жительства твоего и чтим святую память твою. Ты же, предстоя Престолу Божию, приими моления наша и ко Всемилостивому Богу принеси, о еже простити нам всякое прегрешение и помощи нам стати противу кознем диавольским, да избавльшеся от скорбей, болезней, бед и напастей и всякаго зла, благочестно и праведно поживем в нынешнем веке и сподобимся предстательством твоим, аще и недостойни есмы, видети благая на земли живых, славяще Единаго во святых Своих славимаго Бога, Отца и Сына и Святаго Духа, ныне и во веки веков. Аминь.