Мученик Антоний Никопольский (Армянский)
День памяти
святого: 23 июля
Молитвы
Тропарь
Единоумне душею связани бывше,
четыредесять с пятьми страдальцы святии,
на врага ополчистеся,
победителие же явльшеся,
прилете венцы от Христа Бога
и вечное мучений ваших воздаяние,
тыя и нам улучити молите,
благочестно песньми вас величающим.
Кондак
Христа ради, мученицы, многия муки подъясте,
и многобожие низложисте все идольское,
и разрушисте безбожие всякия прелести,
Христовою силою сия поправите,
нас всех верно научаете вопити яве: аллилуйя.
Молитва
О святый угодниче Божий, мучениче Антоний! Подвигом добрым подвизався на земли, восприял еси на Небесех венец правды, его же уготовал есть Господь всем любящим Его. Темже взирающе на святый твой образ, радуемся о преславнем скончании жительства твоего и чтим святую память твою. Ты же, предстоя Престолу Божию, приими моления наша и ко Всемилостивому Богу принеси, о еже простити нам всякое прегрешение и помощи нам стати противу кознем диавольским, да избавльшеся от скорбей, болезней, бед и напастей и всякаго зла, благочестно и праведно поживем в нынешнем веке и сподобимся предстательством твоим, аще и недостойни есмы, видети благая на земли живых, славяще Единаго во святых Своих славимаго Бога, Отца и Сына и Святаго Духа, ныне и во веки веков. Аминь.