Икона Богородицы «Сладкое лобзание»

Молитвы

Тропарь Сладкое Лобзание

Одержащей ереси,
о честней иконе Твоей, Дево,
яве промышлявши:
морешествием Твоей обители
яко дар достоин приношаеши.
Сию же мы Сладколюбящую праве нарицающе,
Тя ублажаем.

Кондак Сладкое Лобзание

Иже в храме и обители Твоей приходящий Ти
и богоугодно спасительная гонящия
и почитающия Твой святый образ,
сим даруй, Дево, Твоя милости,
от всяких избавльши сих скорбей, Тебе вопиющия:
радуйся, Едина Богоневестная.

Молитва Сладкое Лобзание

Приими, всеблагомощная, пречистая Госпоже, Владычице Богородительнице, сия честныя дары, Тебе единей прикладныя, от нас, недостойных рабов Твоих, от всех родов избранная, всех тварей небесных и земных вышшая явльшаяся. Понеже бо Тебе ради бысть Господь сил с нами, и Тобою Сына Божия познахом, и сподобихомся святаго тела Его и Пречистыя крове Его. Темже блаженная еси в родех родов, Богоблаженная, херувимов светлейши и серафимов честнейши сущая. И ныне, всепетая пресвятая Богородице, не престай молящися о нас недостойных рабех Твоих, еже избавитися нам от всякаго совета лукаваго и от всякаго обстояния, и сохранитися нам неврежденным от всякаго ядовитаго прилога диавольскаго. Но даже до конца молитвами Твоими неосужденных нас соблюди: яко да Твоим заступлением и помощию спасаеми, славу, хвалу, благодарение и поклонение за вся в Троице единому Богу и всех Создателю возсылаем, ныне и присно и во веки веков.