пн-пт с 09:00 до 18:00
Всемилостивая наша заступнице,
Мати воплотившагося Бога Слова,
явлей чудоточный образ Свой на Амурстей земли,
из него же Благодать обильно изливаеши,
подавая исцеление недугов душевных и телесных.
О, Всеблагая Богородительнице,
непраздных жен в родах Помощнице,
и Взбранной Воеводе победительная,
от нашествия иноплеменных Крепкий Щите,
Православие в концех земли Российстей укрепи,
и подай душам нашим велию милость.
Богородице Дево, пренепорочная Мати Христа нашего, Заступнице рода христианского!
Пред чудотворною иконою Твоею предстояще, отцы наши молиша Тя, да явиши покров Твой и заступление стране Приамурстей. Темже и мы ныне молим Тя: град наш и страну сию от нахождения иноплеменных свободи и от междоусобныя брани сохрани. Даруй мирови мир, земли плодов изобилие, стране нашей на враги одоление; сохрани во святыне пастырей наших, во святых храмах утруждающихся; осени вседержавным покровом Твоим строителей и благотворителей их.
Утверди в правоверии и единомыслии братий наших; заблуждших же и отступльших от Православныя веры вразуми и соедини святей церкви Сына Твоего. Буди всем притекающим к чудотворней иконе Твоей покров, утешение и пристанище от всяких зол, бед и обстоящий: Ты бо еси больных исцеление, скорбящих утешение, заблуждших исправление и вразумление. Приими моления наша и вознеси я ко Престолу Всевышняго, яко да Твоим предстательством соблюдаеми и покровом Твоим осенями. Прославим Отца, Сына и Святаго Духа, ныне и присно и во веки веков.
Аминь.