Блаженный Исидор Твердислов, Ростовский

Молитвы

Тропарь

Просветився Божественною благодатию, Богомудре,
целомудрием многим и терпением
во временней жизни течение добре скончал еси.
Тем и по смерти яви тя светлость жития твоего:
источавши бо исцелений благодать
иже с верою притекающим ко святому твоему гробу,
Исидоре блаженне,
моли Христа Бога,
да спасет души наша.

Кондак

Взбранному и дивному в праведницех,
иже убо от Христа дар чудес приимшему,
похвальный ныне принесем глаголы,
но яко имея дерзновение ко Святей Троице,
Юже моли избавитися от бед рабом твоим, да зовем ти:
радуйся, Богомудре Исидоре.

Молитва

О великий угодниче Христов, истинный друже и верный рабе Всетворца Господа Бога, преблаженне Исидор! Услыши ны многогрешныя, ныне вопиющия к тебе и призывающия имя твое святое: помилуй ны припадающия днесь к пречистому образу твоему: приими малое наше и недостойное сие моление, умилосердися над убожеством нашим, и молитвами твоими исцели всяк недуг и болезнь души и тела нашего грешнаго, и сподоби ны течение жизни сея невредимо от видимых и невидимых враг безгрешно прейти, и христианскую кончину непостыдну, мирну, безмятежну, и Небеснаго Царствия наследие получити со всеми святыми во веки веков. Аминь.