Блаженный Афанасий Сайко

Молитвы

Тропарь

Глас апостола Твоего Павла услышав глаголющ:
мы юроди Христа ради,
раб Твой, Христе Боже, Афанасий
юрод бысть на земли Тебе ради:
темже память его почитающе,
Тебе молим, Господи, спаси души наша.

Кондак

Вышния красоты желая,
и нижния сладости телесныя тощно оставил еси,
нестяжанием суетнаго мира,
ангельское житие проходя, скончався, Афанасий блаженне:
с нимиже Христа Бога моли непрестанно о всех нас.

Молитва

О великий угодниче Христов, истинный друже и верный рабе Всетворца Господа Бога, преблаженне Афанасий! Услыши ны многогрешныя, ныне вопиющия к тебе и призывающия имя твое святое: помилуй ны припадающия днесь к пречистому образу твоему: приими малое наше и недостойное сие моление, умилосердися над убожеством нашим, и молитвами твоими исцели всяк недуг и болезнь души и тела нашего грешнаго, и сподоби ны течение жизни сея невредимо от видимых и невидимых враг безгрешно прейти, и христианскую кончину непостыдну, мирну, безмятежну, и Небеснаго Царствия наследие получити со всеми святыми во веки веков. Аминь.